Mar liefst 17 kinder van de B.W.B.-schoel deden dit jaor met an de Drèentse veurdracht-wedstried van ‘t Áol Volk in Emmen: een gedichie veurdragen hielemaol oet ’t heufd, en dan ok nog in het Drèents, veur ’n zaal vol publiek! De volgende kinder duurden ’t an:
Lise, Nora, Chayen, Nikki en Robyn oet groep 5a,
Vayen, Isa, Thirza, Max en Nora oet groep 5b,
Hanna, Elin en Floor oet groep 6,
en Isa, Janiek, Zoë en Sara oet groep 8.
’t Miest bezundere vun ik toch wal dat Max met an deed: gebóren in Amsterdam, altied in ’t westen woond, hij woont nog hielmaol niet zo lang in Daolen en dan gaoj ’n Drèents gedichie veurdragen… knap!
Wekenlang hebt de dielnimmers oefend, en wonsdagmiddag 17 april was ’t zo wied, toen waren de beide veurrondes. Veur de kinder oet Daolen was ‘t een thuuswedstried: in een vol restaurant van woon-/ zorgcentrum Selkersgoorn, met kinder oet Wachtum en Emmen der ok bij, en natuurlijk hiel veul olders, oma’s en opa’s, breurties en zussies, bewoners van Selkersgoorn en nog veul aander volk!
De kinder vunnen ’t wal hiel spannend um heur gedichie veur te dragen, maor ok mooi!
An ’t èende kregen ze almaol ’n klein kedoogie, én de finalisten wuren bekend maakt!
De jury had ’n zwaore taak, want alle kinder hadden zó hun best daon!
Oeteindelijk muchten der 9 kinder van de B.W.B.-schoel deur naor de finale, op zaoterdag 20 april in ’t Atlastheater in Emmen.
En daor stao’j dan…op het teniel van zo’n grote zaal! Met zóveul mèensen die naor je kiekt... en ok nog ’n jury: Eric van Oosterhout -de burgemeester van Emmen-,
Klaas Schultz -cabaratier, zölf ooit winnaar van dizze wedstried-
en Lisanne Smit-Boes -zangeres in ’t Drèents en old-leerling van oeze schoel-.
33 veurdrachten waren der al met al, gién priezen veur de B.W.B.-schoel, maor in elk geval veur almaol ’n mooie aovend… en ’n mooie ervaring!
Wàl succes veur Wachtum: net as veurig jaor wun Mans Snijders de 1e pries bij groep 6, 7 en 8. Hij had weer ’n mooi gedicht, dit keer niet over zien pap maor over opa Jan… en hij bracht het weer met overtuging.
De Grada Eding Askesbokaal was dizze keer veur Lana Starrenburg oet Emmen, met ’n gedichie over Koningsdag in Emmen.
En nog even veur álle kinder die dit jaor met hebt daon:
jullie waren ’n mooi cluppie um met te oefenen. Wel wet tot volgend jaor!